КЕРВАНБАШЫ ВЕ ЧАЛБАШ БОРА
(Ривает)
Мевзу муэлифи Фейзи Рахмангъа
буюк итирам иле
Арабистан къумлыкълары атеш киби къыздыра,
Бу азапкъа даяналмай йылан биле сызгъыра.
Керван кете Къырым, Аджем малларынен юкленген,
Бу ёлларда къыркъ йыл юрген Чалбаш бора букленген.
Къатыр эшек огде кете, онда да тюс къалмагъан,
Эшеклернинъ энъ эшеги — чалышмакътан талмагъан…
Керванбашы юкъусырай, къангъып кете кимерде,
Омюринде раат яшап юкъламагъан бир ерде.
Къач эшекни денъиштирген девелернинъ огюнде,
Заваллынынъ кечкен омрю къум-къасыргъа «дюгюнде».
* * *
Акъ-Тааля эр бир шейге екюн чеке, ниает,
Аят кече, омюр бите, файдасыздыр шикает.
Керванбашы кечеджекте бу дюньянынъ ишинден,
Кульбесине айдап келе девелерни пешинден.
— Девелерим, ведалашмакъ вакъыт кельди сизмен, — дей.
Ильк баарим, язым кечти, энди солгъун кузьмен, дей, —
Артыкъ огде дым къаранлыкъ, титис, сувукъ къышым бар,
Падишамы, тиленджими — илле бойле хышым бар;
Сизмен яшап кунь кечирдим, талийиме кусьмеймен,
Сонъ саатте къаршынъызда авф сормагъа истеймен.
Зор кельгенде устюнъизге арткъач юклер юклеттим,
Афта дегиль, айлар бою сувсызлыкъта беклеттим.
Мен озюм де сизден арув яшамадым, билесиз,
Ведалашув куню бугунь… сиз де козьяш силесиз.
Авф этинъиз разы болып, мензилиме кетейим,
Сонъ мекяным, сонъ ериме раат барып етейим…
* * *
Чалбаш бора чыкъты огге козьяшларын акъызып,
Дудакъларын салындырып, чайнай-чайнай сакъызын…
Сёз башлады бораларгъа хас бир джиддий тавурнен,
— Бирге болдыкъ, бирге юрдик бир юрек — бир бавурнен,
Яхшы куньми, яман куньми — бизнен бирге тарттынъ сен,
Э, билемиз, устюмизге агъыр юклер арттынъ, сен;
Юк арткъанынъ багъышлаймыз, Алла разы болсын, деп,
Ахиретте динълейджегинъ Дженнет сазы болсын, деп.
Керванбашы! Тек бир шейни ич багъышлап болмаймыз,
Сонъ ёлунъда бу гуняхны санъа юклеп ёллаймыз.
Сучынъ будыр: кечеркенмиз нидже сахра сыртындан,
Омюр бою юрсеттинъ сен бизни эшек артындан…
Шакир СЕЛИМ
Август 7 — 14, 2001 с.
————————
Аджем — Персия;
аджем малы — персидский товар
Къатыр — мул;
къатыр эшек — пичильген эшек манасында берильсе керек