Сейтумер Эмин в памяти современников

Post navigation

Сейтумер Эмин в памяти современников

В канун Нового года вышла в свет 4-я книга издательского проекта Милли Фирка «Наши юбилеи». Она посвящена жизни и деятельности известного крымскотатарского поэта, писателя, публициста, участника Великой Отечественной войны и Национального движения крымских татар Сейтумера Эмина.

 

О том, как готовилась книга, о её содержании читайте в статье составителя сборника Дильшада Ильясова.

 

*   *   *

 

Сеитумер Эминнинъ 90 йыллыгъына багъышлангъан эдие

 

Сеитумер Эминнинъ 90 йыллыгъына багъышлангъан эдиеУлу истидатлы шаир, языджы, ватанпервер, миллетсевер инсан — Сеитумер Эмин акъкъында, оны якъын бильген замандашларынынъ хатырлавларындан тертип этильген бир китап чыкъармагъа ляйыкъ деген гъае бу йыл 15 майыс куню С.Эминнинъ 90 йыллыгъына багъышлангъан тантаналы акъшам Новороссийск шеэринде кечирильгенде пейда олды, ве бу йылнынъ сонъунадже бойле хатырлав китапны чыкъармакъ керек деген фикирни амельге кечирмеге тырыштыкъ.

Вакъыт аз олгъанындан себеп, бу китапкъа пек аз адамларнынъ хатырлавлары кирсетильди. Лякин Сеитумер Эминни бильгенлер, онынъ иджадынен меракълангъанлар, ширииетинен мешгуль олгъанлар даа чокълар, онынъ ичюн бу адамларгъа буюк риджамыз бар. Бу буюк инсан акъкъында озь бильгенлеринъизни, хатырлавларынъызны, иджады, ширииети акъкъында фикирлеринъизни эвлеринъизде сакъламайып, миллетимизге бильдирмек ичюн бизге ёлламанъызны риджа этемиз. Чюнки бу китаптан сонъра буюкче колемде китап чыкъармакъ бизим ниетимизде, онъа азырлыкъ корьмектемиз. Бу китапкъа С. Эминнинъ дюнья юзю корьмеген эсерлери, шиирлери, эльязмалары, мектюплери, башкъа весикъалары ве оны якъын бильгенлернинъ хатырлавлары кирсетилип, нешир этмек ниетиндемиз. Бойле китап чыкъармакъ баягъы масрафларгъа отураджакъ. Миллетимиз, иш адамларымыз маддий тарафтан къол тутарлар деп инанамыз.

Бу йылнынъ сонъ куньлеринде, Аллаhкъа чокъ шукюрлер олсун, «Сеитумер Эмин замандашларнынъ хатырасында» адлы джыйынтыкъ дюнья юзюни корьди ве бу китап къалемдешлери, сафдашлары, Миллий Арекет иштиракчилери тарафындан онынъ 90 йыллыгъына эдие олур деп инанамыз.

Сеитумер Эмин киби адам миллетимизнинъ осип келеяткъан несилине, бала-чагъасына нумюне олмакъ керек. Онынъ эдждатлар юртуна, ана-топрагъына, Ватанына олгъан севгиси, халкъ ичюн куреш ёлунда джесюрлиги, къоркъубильмезлиги эр кесге ибрет олмакъ керек. Ве бойле адамлар миллетимизнинъ анъында даима яшап, унутулмамакъ кереклер.

Бу китап чыкъмасына себепчи олгъан муэллифлерге, техник тарафтан ярдым эткен Асан Хуршуткъа, бутюн хаталарыны тюзетип, нешир этмесини бойнуна алгъан Ибраим Чегертмагъа ве онынъ коллективине, маддий ярдым косьтерген ватандашларымызгъа самимий тешеккюрлеримни бильдирмеге ашыкъам. Бу адамлар олмагъан олса, бу джыйынтыкъ дюнья юзюни корьмейджек эди.

Келеджек йылнынъ башларында бу китапнынъ презентациясыны кечирмек ве ватандашларымызны таныш этмек, иншааллаh, къысмет олур деп инанамыз.

Дильшад ИЛЬЯС /Шейхзаде/

Багъланмакъ ичюн

тел.:  0957761877,

          0664400520

 

 

Похожие материалы

Ретроспектива дня