АПРЕЛЬ 27 куню Акъмесджитте белли эдибимиз языджы, шаир Билял Мамбет вефат этти. Языкъ, чокъ языкъ. Озюни зорнен аякъта тутып тургъан эдебиятымызнынъ, хусусан бала эдебиятынынъ бир багъанасы даа тюшти.

Билял Мамбет 1935 сенеси февраль 2-де Судакъ районынынъ Къоз коюнде догъды. Сюрьгюнликте Самаркъанд виляети Каттакъургъан районына тюше. Орта мектепни битирген сонъ, Самаркъанд тиджарет институтына кире ве оны 1959 сенеси битире. Джемаат ашы боюнджа технолог-муэндис дипломыны ала. Чырчыкъ, Ташкент шеэрлеринде чалыша. 1964 сенеси «Ленин байрагъы» газетасына ишке давет этиле.

1990 сенеси Къырымгъа кочип кельди. «Достлукъ» — «Къырым» газетасында чалышты. Эдип та мектеп чагъында шиирлер язып башлай ве 1957 сенеси чыкъып башлагъан «Ленин байрагъы» газетасынынъ фааль муэллифлеринден бири ола. Девирнинъ корюмли иджаткярларындан бири оларакъ Билял Мамбет кечкен асырнынъ алтмышынджы йылларында мейдангъа чыкъа ве чокъкъа бармай озюнинъ махсулдар иджадынен балалар шаири оларакъ таныла. Эдипнинъ о девирде «Ягъмур», «Папий голю», «Анамнынъ тюркюси», «Баарь нагъмелери», «Тылсымлы сандыкъ», «Медиханынъ тайчыгъы», «Тёпемизде кунеш», «Япракъ устюнде тамчылар», «Дагъ лялеси», «Меним истегим», «Къоз эфсанеси» киби шиирлер, поэмалар, масаллар, эфсанелер джыйынтыкълары чыкъты. Онынъ бутюнлей шиирий эфсанелерден ибарет сонъки китабы кечкен сене басылып чыкъты.

Билял Мамбет эм буюклер, эм балалар ичюн яза эди. Онынъ балаларгъа багъышланылгъан шиирлери тегиз, саде, меракълы олмакънен бир сырада, балалар психологиясыны билип, оларнынъ яш хусусиетлерини анълап язылгъанлар. Онынъ шиирлеринде аят адиселери балалар тилинен анълатыла, янъылыкънынъ эскиликнен куреши реаль косьтериле, балаларгъа Ватангъа севги, душмангъа нефрет, барышыкъны къорчалав, яхшы окъув, анълы ве интизамлы олмакъ киби чизгилер ашлана.

Билял Мамбет озюнинъ бутюн омрюни, бутюн иджадыны эдебиятымызнынъ сакъланмасына, яшатылмасына, хусусан бала эдебиятынынъ тикленмесине сарф этти. Шаир арамыздан кетсе де, онынъ эсерлери даа чокъ несиллерге хызмет этеджектир.

Эльвида, достумыз. Сенинъ азиз хатыранъ юреклеримизде даима яшар.

Алла рахмет эйлесин. Яткъан еринъ пуф олсун.

Къырымтатар языджылары бирлиги

Правление Республиканского крымскотатарского фонда культуры и коллектив Республиканской крымскотатарской библиотеки им. И. Гаспринского искренне скорбят по поводу кончины поэта и переводчика 

Биляла Мамбета и выражают глубокое соболезнование семье покойного.

Аллаh раhмет эйлесин!

Земаневий къырымтатар эдебиятынынъ векили, чокъ йыллар къырымтатар матбуатында чалышып кельген шаир Билял Мамбет 

вефат эткени мунасебетинен «Йылдыз» меджмуасы онынъ къорантасына терен ве самимий тазие бильдере, сой-акърабаларына баш сагълыгъы тилей.

Мерхум Алланынъ рахметинде олсун.

 «Полуостров» №17 (321), 1 – 7 мая 2009